محمد حافظ اغا يكتب حكايات عن الفلوس

بقلم محمد حافظ اغا

تعرف إن الفلوس اللي بنصرفها كل يوم دي مش مجرد ورق.. دي “ذاكرة أمة” وتاريخ كامل في جيبك !!!!

تعالى أخدك في رحلة عبر الزمن وهنعرف فيها أسرار هتسمعها لأول مرة عن حكاية الفلوس فى مصر ،

وخلينا نبدء من محمد علي باشا..مؤسس مصر الحديثه
سنة 1806، محمد علي باشا أصدر فرمان حدد فيه العملات القانونية (المحبوب، النصف محبوب).. وكانت العملات دي بتضرب في مصر لكن باسم السلطان العثماني.
لكن التاريخ الحقيقي اتكتب سنة 1839.. لما أصدر “ديكريتو” (قانون) بتقسيم العملة لـ 100 قرش.. وهنا ظهر اسم “الجنيه” لأول مرة!

سؤال عبقري ! ليه اسمه “جنيه”؟
الاسم ده مش مصري! ده مشتق من اسم بلد أفريقي هي “غينيا” (Guinea)، والسبب إن الذهب اللي كانت بتتصنع منه العملات الذهبية الإنجليزية وقتها كان بيجي من مناجم غينيا.. فالمصريين “مصروا” الكلمة وبقت “جنيه”!

و نيجي بقى للبريزه فكرين البريزه و الخديوي اسماعيل
ليه بنقول على العشرة قروش “باريزة”؟
الحكاية فيها دراما.. في عهد سعيد باشا (1862)، طلب من “المسيو براناي” في باريس إنه يسك عملة مصرية جديدة. لكن سعيد باشا مات قبل ما العملة توصل!
لما جه الخديوي إسماعيل، رفض يستلم العملة دي عشان مش عليها اسمه، ورجعها باريس تاني تتسيح وتتضرب من أول وجديد!
ولإنها (اتصنعت) في باريس.. المصريين بخفة دمهم سموها “الباريزة”!

“عم إدريس”.. الفلاح اللي صورته نزلت على الجنيه!
في عهد الملك فؤاد الأول، وتحديداً سنة 1926، صدر أول جنيه مصري بيحمل صورة شخص..
تفتكر صورة مين؟ ملك؟ أمير؟
لا.. ده كان “جنايني” ايوه والله جنايني في القصر اسمه “عم إدريس”!
القصة بتقول إن عم إدريس بشر الملك فؤاد (لما كان لسه أمير) إنه هيبقى ملك وهينجب ولي العهد.. ووقتها الملك وعده بمكافأة خيالية.
ولما تحققت الرؤية، الملك فؤاد وفى بوعده، وأمر بوضع صورة عم إدريس الفلاح البسيط على الجنيه المصري.. عشان يتخلد اسمه في التاريخ بلقب “جنيه الفلاح إدريس”

واخيرا نأتي الى،
الملك فاروق و هو الحاكم الوحيد، والأول والأخير في تاريخ مصر الملكية، اللي حط صورته الشخصية بوضوح على العملة سنة 1946 (على الـ 100 والـ 50 والـ 5 والجنيه). و
بعد ثورة 1952، وإسدال الستار على الملكية، كان لازم صورة الملك فاروق تختفي..
ومين أجدر إنه يمثل مصر؟
طبعاً الملك الذهبي “توت عنخ آمون”.. اللي تصدرت صورته الجنيه المصري في الإصدارات الجديدة، عشان يفضل الجنيه المصري بيحكي عظمة وتاريخ البلد دي.

الخلاصة :
العملة اللي في إيدك دي مش وسيلة شراء بس.. دي وثيقة تاريخية شالت صور ملوك، وفلاحين، وشهدت على احتلال واستقلال.. حافظوا على تاريخكم واعرفوه كويس